म्युनिकमध्ये आज गणेशोत्सव सोहळा

योगेश वाडकर, जर्मनीपुणे : गणेशोत्सवाची चाहूल लागली, की घराघरात सुरू होणारी लगबग, मित्रमैत्रिणींना एकत्र बोलून सजावटीसाठी रात्री होणारे जागरण, गणपतीच्या प्रसादाचे नियोजन… उत्सवातील ही धमाल परदेशात गेल्यावर खंडित होऊ नये, तेथील वातावरणातही उत्सवाचे रंग भरता यावेत, या उद्देशाने ‘म्युनिक’मधील महाराष्ट्र मंडळाने १२ वर्षांपूर्वी गणेशोत्सव साजरा करायला सुरुवात केली. दर वर्षी गणेश भक्तांची संख्या वाढत असून, यंदा ३०० हून अधिक लोक उत्सवात सहभागी होणार आहेत.म्युनिकहे जर्मनीतील मोठे शहर. म्युनिक महाराष्ट्र मंडळात दसरा, दिवाळी, गुढीपाडवा, नवरात्र, कोजागिरी असे सगळे सण उत्साहात साजरे केले जातात. गणेशोत्सव हा या मालिकेतील महत्त्वाचा सण. मंडळाने १२ वर्षांपूर्वी गणेशोत्सव साजरा करायला सुरुवात केली. या उत्सवात लहानांपासून ज्येष्ठांपर्यंत सर्वांचा सहभाग असतो. लहान मुलांसाठी विविध स्पर्धा, मोठ्यांसाठी सांस्कृतिक कार्यक्रम, आरती, महाप्रसाद असे नियोजन करून मंडळाचे सभासद एक दिवस गणेशोत्सव साजरा करतात. मराठी बांधवांबरोबर भारतीय लोकांचाही यात समावेश असतो. दर वर्षी सहभागी होणाऱ्या नागरिकांची संख्या वाढतेच आहे. ___ महाराष्ट्रात गणपतीचे आगमन दोन दिवसांपूर्वीच झाले आहे; पण म्युनिकमध्ये आज, शनिवारी गणपतीबाप्पाचे आगमन होणार आहे. बाप्पाच्या स्वागतासाठी मंडळातर्फे ढोल-ताशाच्या गजरात गणरायाच्या मूर्तीची मिरवणूक काढण्यात येणार आहे. यासाठी मंडळातील हौशी कार्यकत्यांनी महिनाभरापासून वाद्य वादनाचा सराव केला आहे. मिरवणुकीनंतर गणपतीची प्रतिष्ठापना करून यथोचित पूजा आणि सामूहिक अथर्वशीर्ष पठण करण्यात येणार आहे. काही उत्साही कार्यकत्यांनी मखर आणि आरास करण्याची जबाबदारी उचलली असून, आकर्षक सजावट केली आहे. दुपारच्या सत्रात लहान मुलांसाठी गणपती मूर्ती बनविण्याची कार्यशाळा होणार आहे, तर मोठ्यांसाठी श्रीधर फडके यांचा ‘फिटे अंधाराचे जाळे’ हा कार्यक्रम आयोजित करण्यात आला आहे. आशुतोष सोहनी हे मंडळाचे अध्यक्ष आणि अभिजित माने हे खजिनदार आहेत. गणेशोत्सवाच्या नियोजनात अनेक हातांनी मदत केली आहे. उत्सवाला ३०० हून अधिक महाराष्ट्रीय; तसेच इतर भाषिक नागरिक उपस्थित राहणार आहेत. (लेखकम्युनिक येथील महाराष्ट्रमंडळाचे सचिव आहेत.) (शब्दांकन: चैत्राली चांदोरकर)